Vallvarður kallaður Valli

Hva ég á víst ennþá bloggsíðu....

Ég verð víst að gefa einhverja ástæðu fyrir því afhverju að ekkert hefur sést á þessari mögnuðu bloggsíðu. Við skulum bara segja að ekkert merkilegt hafi komið fyrir síðustu 3 mánuði og láta þar við sitja. Einnig væri hægt að gera könnun og spyrja fólk hvort það hefði einhvern áhuga á því að heyra um vandræði sem ég lenti í við að leysa síðasta Hafnargerðardæmi, eða þegar Straumfræðin var alveg að fara með mig.

Ég hef reynt eftir öllu mætti að reyna að tala við einhvern hérna á heimilinu þegar ég þarf aðeins að minnka þrýstingin í lærdómsstöðvunum, en á mig stara yfirleitt tóm andlit eftir á. Viðkomandi hristist síðan eilítið til og heldur síðan áfram eins og engin hafði sagt neitt. Ég er með þessu búin að komast að því afhverju fólk, sem á ekki fjölskyldumeðlim í líku starfi leitast við því að eignast vini sem eru það. (Stundum held ég að ég ætti að hætta þessari verkfræði og skella mér bara í félagsfræðina, er alla vega með nóg af hugmyndum um rannsóknarverkefni.)

Núna er að hefjast tímabil sem allir, núverandi sem fyrrverandi, nemendur í HÍ þekkja. Kennararnir keppast við að leggja fyrir síðustu verkefnin og troða inn í hausinn á manni allra síðasta kennsluefninu. Akkúrat í dag liggja á mér 8 verkefni sem ég þarf helst að vera búin með fyrir 1.des. (Reyndar eru sum verkefnin sem ég get skilað þegar lengra er liðið á jólamánuðin.) Í þessum skrifuðum orðum er ég að leggja lokahöndina á 1 verkefni og á morgun klárast annað svo þetta er allt að koma. Og Ella ég skal alveg gera svo sem eitt risk og cost management verkefni ef þú hannar fyrir mig svo sem eitt stálþil. Til vara bið ég þig að hanna ferjuhöfn í Bakkafjöru.

Að meiri hagnýtum vina upplýsingum þá skal viðurkennt að síðustu mánuðir eru búnir að vera frekar einmannalegir hérna á klakanum. Sverrir, Bjössi og Mummi fluttu allir til Danaveldis í Ágúst og Haukur hefur verið rosalega upptekin þessa síðustu mánuði þannig að það er bara ég og Siggi sem erum hérna á klakanum. Höfum reyndar dottið inn í nokkra sjónvarpsþætti sem við höfum verið að horfa á svo ég kvarta ekkert. Ég hef líka verið að reyna draga hann niður í WoW-svaðið (World of Warcraft) en með takmörkuðum árangri. Hann er alla vega ekki komin á nógu hátt (lágt) þrep fyrir minn smekk.

Einn af þáttunum sem við höfum verið að horfa á er Rome. Þáttur framleiddur af HBO og BBC og fjallar um þegar Sesar er að komast til valda í Rómaveldi. Þetta er mjög áhugaverður þáttur og ég ráðlegg öllum að kíkja á hann þegar hann kemst á skjá nálægt þér. Miðað við þá vitneskju sem ég hef um þennan tíma virðist þátturinn vera sögulega nákvæmur og leikurinn er eins og hann gerist bestur. Síðasta þáttur hafði síðan eitt skylmingarþræla-atriði sem lét Russel Crowe, í Gladiator, líta út eins og vælukjóa.

Þetta ætti að duga í bili, eða alveg þangað til á eftir þegar ég svara áskorununni sem mér berst frá Belgíu.

posted by Vallvarður @ 17:42